Heimehjelp

Arbeidsoppgåver som blir utført av heimehjelp

Reinhald: Golvvask, pussing av vindaugo, støvsuging og støvtørking av rom som er i dagleg bruk. Denne type reinhald vil bli utført ein gong i veka eller annakvar veke. Reingjering av avtrekksvifte over komfyr minst ein gong i året. Husvask blir ikkje utført av heimehjelp.
Vask av tekstilar/klede: Heimehjelpa kan ta småvask, dvs.tekstilar/klede som kan leggjast i bløyt og bli vridd opp. Anna vask må foregå i maskin. Dei som ikkje har vaskemaskin, kan få vaska kleda sine ved å ta kontakt med lokalt vaskeri.
Innkjøp: Nærbutikken bør brukast til innkjøp av mat. Primært skal heimehjelpene som handlar inn for brukar, skrive varene på rekning. Betaling med kontantar skal skje berre unntaksvis. Kvittering skal leverast til brukar saman med varene i båe tilfelle.
Mat: Heimehjelpene kan utføre hjelp til førebuing av måltid og enkel matlaging. Middagslaging blir berre utført ved særskilde behov. Heimehjelpa kan ordne med avtale om matombringing. Baking, safting og sylting inngår ikkje i arbeidet til heimehjelpa.
Personleg hygiene: Heimehjelpa kan utføre hårvask og bad, samt enklare hudpleie.
Sosiale aktivitetar: Heimehjelpa skal orientere om dei tilbod kommunen har, og oppmuntre til deltaking.
Utearbeid: Heimehjelpa kan bere inn ved og måke snø rundt trappene. Hogging av ved og lagring av større mengder ved inne er ikkje heimehjelpsoppgåver. Heller ikkje hagearbeid, innhausting av bær, frukt og poteter inngår i heimehjelpa sitt arbeid.
Heimehjelpa har ikkje ansvar for opprydding etter gjester, som t.d. reiing av senger og sengeskift.

Tenesta nyttar elektronisk pasientjournal

Heimehjelpa har rapporteringsplikt til overordna om tilhøve hjå brukar, t.d. endring i helsetilstand. Brukar skal på førehand alltid informerast om dette.
Som kommunalt tilsett har ikkje heimehjelpa lov til å motta gåver frå brukarane.
Teieplikt: Heimehjelpa har teieplikt i alle forhold rundt brukarane.
Oppseiing av tildelt heimehjelp skal skje skriftleg.