Kristian Olav Garmo er tilsett i vikariat som kyrkjeverje i Lom. Den faste innehavaren av stillinga, Borghild Skarelven, har eitt års permisjon for å gjera teneste i tilsvarande stilling i Stryn. Garmo har bachelor i samfunnsøkonomi frå UMB (Universitet for miljø- og biovitenskap) og byrja i stillinga 1. januar.
Med helsing
for Lom kyrkjelege råd
Steinar Angard
leiar

Med så mange flotte namn på listene våre, gjekk vi inn i kyrkjevalet med glede og stor forventning, og tross at vi i år hadde val bare ein dag, syner frammøteprosenten at det var ein liten auke i Garmo og Lom, mens Bøverdalen hadde ein svak nedgang.

Frammøteprosenten
Bøverdalen: 27% (2009-29%)
Garmo: 35% (2009-34%)
Lom (Lia/Loar): 13% (2009-12%)

Kyrkja har 2 brannøvingar i året, ein organisatorisk og ein praktisk. Tysdag 5. juli var det praktisk brannøving ved Lomskyrkja. I tillegg til tilsette, var det òg med nokre naboar av kyrkja på denne øvinga.

Lom kyrkjelege råd har bestemt seg for å bruke avletter til nattverdbrød. Fata som er til oblater vert da for lite og nye fat til avletter vart tinga. Bjørnar Stenersen har laga desse flotte fata som de kjem til å sjå no i påska når det er nattverd.

Kyrkjetenar Sigurd Stenersen og kyrkjetenar/organist Terje Blakarstugun har kvar seg arbeidd meir enn 30 år i kyrkjene i Lom.

Velkomen Synnøve Sakura Heggem!

Sundag 17.oktober tok Lom imot sin fyrste kvinnelege sokneprest, Synnøve Sakura Heggem. Ei fullsett Lom stavkyrkje var pynta til fest med born, prestar frå nabosokna, prosten, mykje bygdefolk og om lag 40 personar frå Rena, der nypresten har vore til no. Gudstenesta vart ei festsamling med innsetjing av Synnøve, dåp og nattverd, og med lokale aktørar som gledde oss med klingande song og spel.

Kyrkjekaffien på Fossberg venta oss etter messa med mykje god mat og eit hyggeleg vertskap. Det var fleire som utrykte glede og takksemd over at Synnøve er komen til oss i Lom og mange gode ynskje for at ho vil finne seg til rette og trivast her. Og vi fekk høyre talentfulle Vemund Olav Aukrust spela på piano.
Fleire frå Rena viste tydeleg gjennom tale og song kor mykje Synnøve har betydd for dei dei åra ho var prest der, og gav sterke formaningar om at Lom tek godt vare på ho.

Tusen takk til alle aktørar og bygdefolk at dykk var med oss denne dagen og gjorde gudstenesta og kyrkjekaffien så flott og minnerik.
Ungane i Lom barneklang sa unisont det vi alle ynskjer å setja ord på:
Vælkomen åt oss, Synnøve prest!


Foto: Hans Erik Kjosbakken, Fjuken.