Fakta om Lom som nasjonalparklandsby

Sertifiserte oppmuntringsagentar

Nyskaping er kjernen i satsinga

Kjernen i statusen er verdiskaping og natur. Lom har ”gjestfritt og nyskapande” som visjon, og har difor valt å satse på tiltak som kan gje meir innovasjon.

Lokalsamfunnet må støtte opp om initiativtakarar i næringslivet og friviljug sektor. Eksempel på tiltak som er gjennomført er:
- Entreprenørskap i ungdomsskulen, eigne opplegg i 8, 9 og 10. klasse
- Kurs i entreprenørskap for lærarar på ungdomsskulen
- Kurs i skaparkraft og kreativitet for pedagogiske leiarar i barnehagane
- Inspirasjonskveldar for næringsliv, tilflyttarar og andre med humørbonde Geir Styve
- Landsbykafé for næringslivet
- Etablering av Liv i Lom-fondet
- 14 personar frå ulike institusjonar i Lom er sertifisert som oppmuntringsagentar og har lært verktøy for idéutvikling
- Studietur til nasjonalparklandsbyen Vingelen, Røros og Funäsdalen med fokus på nyskaping i reiselivet ut frå tanken om berekraftig utvikling.

Eit livskraftig lokalsamfunn

Det er mykje kunnskap om nasjonalparkane blant lomværene. Satsinga på nasjonalparklandsby er avhengig av at fleire får ta del i denne kunnskapen. Det har vore fleire arrangement som gjer at denne kunnskapen kan delast, slik som opningsarrangementet av Lom som nasjonalparklandsby, landsbydagen i mai 2009 og opning av Breheimen nasjonalpark i august.
Andre satsingsområde for nasjonalparklandsbyen er stadutvikling og miljø. Det er laga ein plan for stadutvikling og i sommar vart fleire stiger ut frå sentrum og Bergomsrunda rusta opp og merkt på nytt. Det er utnemnt miljøagentar i barneskulen og det har vore ein kampanje for ”Posefritt Lom”.

Lokal organisering

Lokal organisering I Lom er det landsbyrådet som er pådrivar for å utvikle nasjonalparklandsbyen. Her sit representantar frå reiselivet, formannskapet, Norsk Fjellmuseum/Jotunheimen nasjonalparksenter og administrasjonen i kommunen. Formannskapet er styringsgruppe.

Nasjonalt nettverk

Lom har teke initiativet til eit nasjonalt nettverk for nasjonalparklandsbyane Jondal, Vingelen, Geilo, Storslett og Lom. Dei fem stadene skal syte for erfaringsoverføring og marknadsføre Noregs nasjonalparklandsbyar. Ordførar i Lom Simen Bjørgen er leiar av styringsgruppa for nettverket.

Verdiskapingsprogrammet for naturarven

Noregs nasjonalparklandsbyar vart plukka ut som satsingskommunar gjennom verdiskapingsprogrammet for naturarven som vart lansert i år. I eit 5-årig program blir nettverket tilført midlar til lokale tiltak i landsbyane og til å marknadsføre landsbyane mot turistar. I 2009 har Lom fått midlar til å oppruste Bergomsrunda gjennom dette programmet.