Pris og betaling for barnehageplass

Kommunestyret fastset satsane for foreldrebetaling i samband med budsjettet kvart år. Du skal likevel aldri betale meir enn den makssatsen som blir fastsett i statsbudsjettet.

Betaling skjer kvar månad, og reknast ut frå den tida barnet ditt har fått plass i barnehagen. Dersom barnet har lengre sjukefråvær, kan kommunen ettergje betaling for den perioden barnet ikkje har vore til stades. Prisane finn du alltid både på søknadsskjemaet og på kommunen sine heimesider.

Foreldre/føresette betaler for 11 månader i året – fem månader om hausten og seks månader om våren. Når barnet startar i august, betaler du berre for ein halv månad. Dersom du tek ut barnet ein ekstra månad i samband med sommarferien, får du denne månaden betalingsfri.

Betaling for mjølk, frukt og eventuelt annan mat er eit tillegg, og kjem på same rekning som opphaldsbetalinga.

Har du fleire barn i barnehage?

• Om du har meir enn eitt barn i barnehage i same kommune, skal kommunen sørgje for at du får reduksjon i foreldrebetalinga – dette blir kalla søskenmoderasjon.
• Du har rett til søskenmoderasjon sjølv om barna går i ulike barnehagar, og sjølv om barnehagane har forskjellige eigarar.
• For det andre barnet skal du få minst 30 prosent reduksjon.
• For det tredje barnet og eventuelt fleire, er barnehageplassen gratis.

Har du låg inntekt?

Det finst to ordningar for familiar og hushald med låg inntekt:

1. Reduksjon i foreldrebetaling

Ingen skal betale meir enn 6 prosent av samla inntekt for ein barnehageplass.
Dersom maksprisen er høgare enn 6 prosent av inntekta di, skal du få redusert pris.

2. Gratis kjernetid

Alle 2-, 3-, 4- og 5-åringar, og barn med utsett skulestart, som bur i hushald med låg inntekt, har rett til 20 timar gratis opphald i veka i barnehage.

Frå 1. august 2025 er inntektsgrensa 669 050 kroner.

Ordninga gjeld uavhengig av om barnet har heiltids- eller deltidsplass.
Har barnet rett til gratis kjernetid, får det 20 timar gratis per veke – også om familien vel å bruke berre desse timane.

Foreldre skal ikkje betale meir enn maksprisen for ein barnehageplass. I dei minst sentrale kommunane (sone 5 og 6 i sentralitetsindeksen til Statistisk sentralbyrå) er maksprisen redusert til 700 kroner frå 1. august 2025.

Lom er i sentralitetssone 6.