Skulehelseteneste (6-20 år)

Skulehelsetenesta arbeider for å fremje god helse og førebyggje utfordringar hos barn og unge. Tenesta fylgjer dei nasjonale rettleiarane for helsefremjande og førebyggjande arbeid i skule og helsestasjon.

Kva kan skulehelsetenesta hjelpe med?

Du kan ta kontakt med skulehelsetenesta viss du vil snakke med nokon om:

• Trivsel, venskap og relasjonar
• Kropp, helse og utvikling
• Tankar og kjensler
• Stress og press i kvardagen
• Førebygging av mobbing og vald
• Råd om kosthald, søvn og fysisk aktivitet

Skulehelsetenesta samarbeider med føresette, skulen og andre tenester når det er nødvendig, for å sikre at barn og unge får best mogleg oppfølging.

Teieplikt

Alle som jobbar i skulehelsetenesta har teieplikt etter helsepersonellova. Det betyr at det du seier blir behandla konfidensielt. Viss det er behov for å samarbeide med andre, må føresette samtykke til dette. Eit munnleg samtykke er like bindande som eit skriftleg.

Kva får foreldra mine vite av det eg tek opp med helsesjukepleiar?

Helserettsleg myndigheitsalder i Norge er 16 år. Det betyr at som hovudregel vil foreldra dine, eller den som har foreldreansvaret, bli informert om helsetilstanden din og kva helsehjelp du får. Dei har rett til innsyn i journalen din når du er yngre enn 16 år. Det er nokre unntak frå denne regelen:

• Er du mellom 12-16 år blir det av grunnar som bør respekterast, ikkje gitt informasjon til foreldra dine utan at du sjølv ynskjer det.
• Informasjon til foreldre blir ikkje gitt, uansett alder, dersom det er tungtvegande årsakar som talar mot det.
• Er du mellom 16-18 år skal berre opplysningar som er naudsynt for å fylle foreldreansvaret bli gjeve. Vi skal orientere deg om kva informasjon vi gir til foreldra dine.

Er du usikker, så ta opp spørsmålet om informasjon til foreldre med helsesjukepleiar, før du legg fram det du lurar på. Saman finn vi ei god løysing for deg og din situasjon.