Smittevern omfattar førebyggjande tiltak, informasjon til innbyggjarane og samarbeid med fastlegar, helsestasjon, barnehagar, skular og helseføretak.
Kven har ansvar?
Kommunen har hovudansvaret for det smitteførebyggjande arbeidet lokalt. Kommunen har ein smittevernlege som har fagleg ansvar for smittevernet i Lom. Smittevernlegen gir råd til innbyggjarar, helsepersonell og andre tenester i kommunen.
Ved mistanke om smittsam sjukdom, eller behov for testing, kan du ta kontakt med fastlegen din. Ved akutt behov utanom kontortid, kontakt legevakt på telefon 116 117.
Sentrale oppgåver innan smittevern
- Råd og rettleiing til befolkninga
- Informasjon om vaksinasjon og førebyggjande tiltak
- Smittesporing og oppfølging ved sjukdomsutbrot
- Samarbeid med barnehagar, skular og helseinstitusjonar
- Vaksinasjon etter anbefalingar frå Folkehelseinstituttet (FHI)
- Handtering av utbrot og beredskap ved pandemi
Tuberkulosekontroll
Personar som kjem frå land med høg førekomst av tuberkulose, og som skal bu i Noreg i meir enn tre månader, skal gjennomgå tuberkuloseundersøking. Dette gjeld til dømes flyktningar, asylsøkjarar, studentar, arbeidstakarar og familiegjenforeinte. Undersøkinga er gratis og vert følgt opp av helsestasjon for flyktningar eller fastlege.
Vaksinering
Lom kommune tilbyr vaksinar i tråd med barnevaksinasjonsprogrammet, influensavaksinering og vaksinar ved behov (t.d. ved utanlandsreise eller særskilt risiko). For meir informasjon om vaksinasjon og reisevaksinar, sjå vaksineinformasjon på kommunen si nettside eller kontakt helsestasjonen.
Meld frå om smittsam sjukdom
Dersom du jobbar i helsevesenet, i skule/barnehage eller med mat, og du får ein smittsam sjukdom (som til dømes omgangssjuke), har du plikt til å melde frå. Dette for å unngå vidare smitte til andre.