Bruksareal omfattar heile det innvendige arealet i bustaden – det vil seie både opphaldsrom, kjellar, bod og loft, så lenge dei er målverdige.
For ein del bygg manglar det registrert bruksareal, dette skuldast registeret sin historikk. Vi oppdaterer bygningsdata fortløpande.
Er opplysningane feil?
Dersom du som eigar ser at det er feil i matrikkelen samanlikna med godkjente byggesaker, har du rett til å be om retting.
Du kan melde frå ved å fylle ut skjema for krav om retting, og leggje ved dokumentasjon.
Skjema for krav om retting
Bruksareal og gebyr for vatn og avløp
Når bustader ikkje har installert vassmålar, brukar kommunen bruksarealet (BRA) frå matrikkelen som grunnlag for å rekne ut vatn- og avløpsgebyr.
BRA omfattar heile arealet innanfor dei ytre veggane til brukseininga, uavhengig av korleis romma blir brukt.
Areal mellom brukseiningar og fellesareal blir ikkje tekne med i utrekninga.
For at ein etasje skal reknast som målverdig, må takhøgda vere minst 1,90 meter over ei breidde på minimum 60 cm. Det spelar inga rolle om det manglar golv, vindauge eller isolasjon – det er dei fysiske måla som teller.
Har du ein bustad som er registrert feil?
Tomannsbustad eller einebustad?
Dersom bygninga di står registrert som einebustad, men i verkelegheita alltid har vore ein tomannsbustad, kan dette skuldast at registreringa er gjort ut frå ei utvendig befaring.
- Dersom dokumentasjonen viser at bygninga er godkjent som tomannsbustad, kan du be om at matrikkelen blir retta.
- Dersom bygninga er godkjent som einebustad, men du ønskjer å dele han opp, kan du sende inn ein søknad om å etablere ei ny bueining.
Sjølvstendig bueining
Skal ein bustadeining få sitt eige bruksnummer i matrikkelen, må den vere godkjent som sjølvstendig bueining etter reglane i plan- og bygningslova.
Her finn du ei oversikt over ulike omgrep innan arealberekning
Bruksareal, forkorta BRA, er det totale arealet innanfor dei ytre ytterveggene på ein bygning. Dette inkluderer også innvendige veggar, tekniske sjakter og liknande.
Bruksarealet for ein bygning er summen av arealet i alle målverdige plan og etasjar, uavhengig av korleis romma blir brukte.
Garasjar og boder som er bygd saman med bustaden, blir rekna med i bruksarealet. Frittståande garasjar og boder blir derimot ikkje tekne med i BRA for bustaden.
BRA blir brukt som grunnlag ved utrekning av enkelte kommunale gebyr, og det er derfor viktig at opplysningane er korrekte. Dersom du oppdagar feil i registrert bruksareal, kan du ta kontakt med kommunen for retting.
Eit plan eller ei etasje blir rekna som måleverdig dersom det har ei fri høgd på minst 1,90 meter over ein breidde på minst 60 centimeter.
I rom med skråtak blir også delar med lågare takhøgd tekne med i arealet, men berre inntil 60 centimeter til kvar side av den delen som har tilstrekkeleg høgd. Meir detaljert informasjon om dette finn du i rettleiaren Grad av utnytting.
Arealet blir rekna som måleverdig uavhengig av tilgjenge – det vil seie at det ikkje spelar nokon rolle om det til dømes manglar golv, vindauge eller isolasjon. Det er takhøgda som er avgjerande.
Grunnflate er ikkje eit offisielt eller standardisert omgrep, men blir ofte brukt i daglegtale om arealet som grunnmuren til ein bygning dekkjer.
Ved utrekning av kor mykje av tomta som er bygd ned – til dømes i byggesaker – er det derimot BYA (bebygd areal) som er det rette fagomgrepet.
BYA omfattar det arealet bygningen faktisk opptar på bakken. Dette inkluderer også delar som stikk utanfor fasaden, dersom dei påverkar bruken av terrenget under – som til dømes takoverbygg, altanar eller terrassar på søyler.
For ei meir detaljert forklaring på kva som blir rekna med i tomta sitt bebygde areal, viser vi til Direktoratet for byggkvalitet sine nettsider.
Ansvarleg for tenesta: Plan, byggesak og miljø