Nummeret blir tildelt av kommunen og registrert i eigedomsregisteret matrikkelen. Gards- og bruksnummer blir forkorta til gnr. og bnr., og du treng det til dømes når du:
- kjøper eller sel ein eigedom
- søkjer om byggetiltak
- skal tinglyse dokument
- ønskjer opplysningar frå tinglysinga
Opplysningar som areal, grenser, bygningar og vegadresse er registrerte i matrikkelen. Gards- og bruksnummer finst både i matrikkelen og i grunnboka.
Du kan få full oversikt ved å bestille eit matrikkelbrev.
Når gards- og bruksnummer blir brukt som adresse
I nokre kommunar finst det eigedomar utan vegadresse. Desse har i staden ei såkalla matrikkeladresse, som er basert på:
- gards- og bruksnummer
- eventuelt festenummer (fnr.)
- og i nokre tilfelle eit undernummer
Seksjonsnummer ved seksjonering
Når ein eigedom blir seksjonert – til dømes ein blokk eller eit rekkehus – får kvar eining i bygget eit eige seksjonsnummer (forkorta til snr.) i tillegg til gards- og bruksnummeret.
Dette skjer når fleire personar eig ein eigedom saman, men kvar av dei skal ha einerett til å bruke ei bestemt eining (t.d. bustad) på eigedomen.
Festenummer - når eigedommen blir leigd bort
Dersom ein del av ein eigedom blir leigd ut som festetomt, får den delen eit festenummer (fnr.) i tillegg til gards- og bruksnummeret frå hovudeigedommen. Dette kallar vi ei festegrunn.
Før festekontrakt kan tinglysast, må området målast opp og registrerast hos kommunen.
Sjå meir om gards- og bruksnummer på Kartverket
Ansvarleg for tenesta: Plan, byggesak og miljø