1: Behovsvurdering og planlegging
Søknaden skal innehalde ei behovsutgreiing som omfattar:
– Type anlegg og kva behov det skal dekke, inkludert innhald og dimensjonering (t.d. tal brukarar, type bruk).
– Vurdering av anlegget i relevante kommunale planar og handlingsprogram.
– Lokalisering i høve til andre tilsvarande anlegg (t.d. avstand og dekning).
– Opplysningar om innbyggjartal og brukargrupper.
– Tal på medlemmar i idrettslaget eller laga som skal bruke og drifte anlegget.
– Barn og unge sine behov skal synleggjerast, og vurderast opp mot eksisterande tilbod.
Denne utgreiinga skal danne grunnlaget for val av innhald og storleik på anlegget.
2: Universell utforming
Det skal leggjast ved omtale, skisse eller bilete som viser korleis universell utforming er tenkt ivaretatt, i tråd med gjeldande føresegner og rettleiar for universell utforming av idretts- og nærmiljøanlegg. Det skal nyttast byggteknisk forskrift TEK17.
3: Tilstandsrapport
Ved rehabilitering av eksisterande anlegg skal tilstandsrapport følgje søknaden.
4: Situasjonsplan
Situasjonsplan i målestokk 1:1000 eller 1:500 bør leggjast ved. Denne skal vise arealet som skal nyttast til anlegget, samt eventuelle areal for vidare utvikling.
5: Kostnadsoverslag og finansiering
– Detaljert kostnadsoverslag skal vere utarbeidd av kvalifisert personell, basert på tilbod frå leverandør eller utførar.
– Overslaget skal skilje tydeleg mellom kontantutgifter og dugnadsverdi, og vere spesifisert med fleire postar.
– Finansieringsplan skal dokumentere alle finansieringskjelder, som til dømes lånetilsegn, tilsegn om tilskot, kontoutskrifter for eigenkapital, privat støtte, anna offentleg støtte og dugnadsverdi.
Merk: Kommunar kan nytte mva-kompensasjon som dokumentasjon, dette gjeld ikkje frivillige lag og organisasjonar.
6: Driftsplan
Det skal leggjast ved ein plan for drift og vedlikehald av anlegget, med oppsett for driftsintervall og budsjett.
7: Landskapsplan
Landskapsplan som viser korleis anlegget tilpassar seg omgivande busetnad og landskap skal vere med.
8: Reguleringsstatus
Vedlagt reguleringsplan eller arealplan må innehalde kommunen sitt vedtaksdato for godkjenning.
9: Krav til utstyr i nærmiljøanlegget
Utstyr i nærmiljøanlegg skal vere sertifisert etter NS EN 16630 (fastmontert utandørs treningsutstyr) og NS EN 16899 (parkour-utstyr). Rette sertifiseringar skal dokumenterast i søknaden.
Tillegg for spesifikke anleggstyper:
Innandørsanlegg
– Anlegget skal vere utforma i samsvar med gjeldande byggforskrifter.
– Planteikningar av alle etasjar i målestokk 1:100, med innteikna dørar, dusjar, WC, garderobe, kjøkken m.m.
– Snitteikning i målestokk 1:100 som viser takhøgd og eventuell tribunestigning.
– Fasadeteikningar i målestokk 1:100.
Idrettsbaner, turvegar, skiløyper og turstiar
– Baneplan i målestokk 1:500 som viser merking, radius og overhøgde/fall.
– Plan for fast dekke i målestokk 1:200 med nøyaktig avgrensing.
– Dreneringsplan i målestokk 1:500 med suge- og samleleidningar, kummar, sluk, og avskjeringsgrøfter.
– Snitt og lengdeprofilar som viser grunnforhold, oppbygging og materialbruk.
– Turvegar, løyper og stiar bør vise kvileplassar og skilting. Bruk av Merkehåndboka er tilrådd.
– Det må gjerast greie for korleis tiltaket er vurdert i tråd med naturmangfaldlova.
Anlegg med undervarme
– Planteikning som viser plassering av varmesentral, røyrføringar og oppbygging.
– Val av energikjelde skal grunngjevast.
Rehabilitering av kunstgrasbaner med plastfyll
– Det skal dokumenterast at tiltaket tilfredsstiller forskrift om begrensing av forurensning, jf. retningslinjer frå Miljødirektoratet.
Andre tilleggskrav
– For fleire typar anlegg kan det gjelde særskilde tilleggskrav. Desse må følgjast etter gjeldande retningslinjer.