Spelemidlar til lokale kulturarenaer

Føremålet er å bidra til eigna lokale, bygningar og utearenaer som gjev rom for ulik kulturell verksemd.

Tilskot kan gjevast til kulturhus, fleirbrukslokale eller spesiallokale for kunst og kultur, som bibliotek, bygg for museum eller andre kulturverntiltak, scenekunstlokale, konsertsal eller formidlingslokale for biletkunst.

Midlane kan brukast til nybygg, ombygging og modernisering av kulturbygningar, men ikkje til vedlikehald eller drift.

Berre allmennyttige anlegg kan få tilskot, det vil seie at kommersielle aktørar ikkje kan søkje. For aksjeselskap må vedtektene godkjennast, og det må gå fram at det er eit allmennyttig, ikkje-kommersielt selskap.

Du må setje deg godt inn i både dei statlege og fylkeskommunale retningslinene.

Statlege retningsliner for tilskot til kulturbygg

Fylkeskommunale retningsliner for tilskot til kulturarenaer

Søknadsfristen til Innlandet fylkeskommune er 1. mars.

Før du sendar inn søknaden, skal den vere behandla av kommunen med ei uttale.

Ta derfor kontakt med kommunen i god tid før du skal søke.

• Innlandet fylkeskommune kan be om tilleggsopplysningar og gjennomføre synfaring dersom det er nødvendig for saksbehandlinga. Dette vil i så fall skje i samarbeid med kommunen.
• Innlandet fylkeskommune får normalt tildelinga frå Kulturdepartementet i mai kvart år.
• Hovudutvalet for kultur i Innlandet fylkeskommune gjer vedtak om tildelingar. Vedtaka inneber anten avslag eller ei konkret tildeling med eit beløp i kroner. Det blir ikkje sett opp venteliste utover det vedtaket seier.
• Dersom søknaden din får avslag, eller lågare tilsagn enn du søkte om, kan du normalt ikkje søkje på nytt. Berre dersom det skjer vesentlege endringar i prosjektet, kan du søkje igjen neste år.
• Rapportering og utbetaling skjer gjennom kommunane.
• Tilsagn på over 400 000 kroner skal godkjennast av revisor. Lågare tilsagn skal godkjennast av kommunen når dei ber om utbetaling.

Søknaden må sendast inn før tiltaket/prosjektet er fullført, og så tidleg som mogleg.

Før du sender søknaden til Innlandet fylkeskommune

• Kommunen skal kommentere behovsvurderinga.
• Dersom det er fleire søknader frå éi kommune, må kommunen setje opp ei prioritering mellom søknadene.
• Ved større prosjekt bør søkjaren avtale eit dialogmøte for å sikre eit godt samarbeid med aktørane som skal bidra i prosjektet.

Krav til søknaden

• Prosjektet må vere planlagt ut frå definerte behov innan kunst og kultur.
• Tiltaket/prosjektet bør samsvare med prioriteringane i Kulturstrategien til Innlandet fylkeskommune.

Desse vedlegga skal følgje søknaden

• Behovsvurdering med kommentarar frå kommunen
• Planteikningar med kommentarar
• Budsjett som inneheld avsetningar til kunst, usikkerheit og reserve
• Framdriftsplan for byggeprosjektet
• Finansieringsplan som syner at prosjektet er fullfinansiert
• Ein realistisk driftsplan for dei neste 20 åra
• Vedtekter, leigeavtale eller liknande

Kulturrådet: ARENA - tilskotsordning for bygg og infrastruktur (tidligare Rom for kunst)

Kulturrom (tidligare Musikkutstyrsordningen)