Bu i Lom?

Lom sentrum, Fossbergom, ligg under Lomseggen og er eit naturleg knutepunkt mellom aust og vest. Her er det kort veg både til fjord og fjell.

I sentrum bur det kring 800–900 fastbuande, men med vårsola og sommarturistane veks folketalet kraftig, og toppar seg i juli.

Som nasjonalparklandsby har Lom eit rikt tilbod både for fastbuande og tilreisande:

• Norsk fjellmuseum og Steinsenteret
• merka turløyper rett frå sentrum
• Lom stavkyrkje
• mange gode serverings- og overnattingsstader
• heile fire sportsbutikkar – og mykje meir!

Bøverdalen, ofte kalla dalenes dal, er eit godt val for deg som vil bu tett på storslått natur og høge fjell.

Tettstaden Galdesand ligg i eit viktig vegkryss – herifrå kan du ta vegen opp til Galdhøpiggen, Nord-Europas høgaste fjell, eller køyre vidare over Sognefjellet til dei vakre fjordane på Vestlandet.

Her bur du rett ved grensa til både Jotunheimen og Breheimen nasjonalpark, med tilgang til snø og skiføre store delar av året.

I Bøverdalen finn du også eit variert servicetilbod:

• hotell og andre overnattingsstader
• matbutikk
• klatrepark
• sommarskisenter

Og visste du at Flåklypa er ein ekte stad? Den ligg langs vegen innover Bøverdalen.

Garmo er kjend for å ha ein av dei beste barnehagane i landet (foreldreundersøkinga 2021), med store og flotte areal både inne og ute. Her bur du sentralt til, med kort veg til både Lom og Vågå, og gode pendlarmoglegheiter langs Rv15.

I nærområdet finn du fine turmål som Høgkollen, og du har lett tilgang til jakt, fiske og friluftsliv – med Tesse og Soleggen som populære perler i «bakgarden».

Garmo byr òg på fleire opplevingar og tilbod:

• Brimiland med overnatting, matservering og klatrepark
• gardsutsal og sesongbaserte serveringsstader
• Sandom Retreatsenter – ein stad for kvile og undring

I Lia bur du høgt og fritt, med gode solforhold og flott utsikt. Samstundes har du kort veg både til Fossbergom og Vågåmo. Herifrå ser du ned mot elva Otta, som renn vidare ut i Vågåvatnet.

Om vinteren finn du gode langrennsforhold, med lysløype og fleire lengre trasear. På sommaren ligg fjellopplevingane tett på – Lia grensar til Reinheimen nasjonalpark og gir lett tilgang til små og store turar heile året.