Bruk av open eld

Hovudregel

Open brenning og brenning av avfall i småomnar er forbode i heile kommunen, med nokre unntak.

Kva meiner vi med open brenning og småomnar?

• Open brenning: All brenning som skjer utandørs.
• Småomnar: Forbrenningsomnar som ikkje har løyve frå Miljødirektoratet eller er godkjende etter statlege forskrifter.

Unntak

Dette er lov når det ikkje er brannfare eller ulempe for folk i nærleiken

• Matlaging på grill, utepeis og kaffibål.
• Bråtebrenning og brenning av tørt hageavfall utanfor tettbygde område frå 15. september til 15. april.
• St. Hans- og Olsokbål utanfor tettbygde område, med reint og tørt trevirke.
• Kvistbrenning på hogstfelt, halmbrenning på dyrka mark og flatebrenning i skogbruket utanfor tettbygde område frå 15. september til 15. april.
• Brenning av tjøremiler i same tidsrom, etter søknad til kommunen.
• Brannøvingar i regi av Lom og Skjåk brannvesen.

Tidsrom med særskilde reglar

Frå 15. april til 15. september er det forbode å gjere opp eld i eller nær skog og annan utmark utan særskilt løyve, med mindre det openbart ikkje kan føre til brann.

Dette er forbode etter forskrifta 

• Brenning av impregnert, malt eller overflatebehandla trevirke.
• Brenning av avfall frå verksemder (næringsavfall).
• Brenning i periodar der kommunen har oppheva unntaka på grunn av dårleg luftkvalitet.