Medverknad

Noko av det viktigaste du som innbyggjar kan gjere for å påverke samfunnet, er å stemme ved val. I Norge har vi både stortings- og sametingsval og lokalval. 

Ved å stemme ved kommunevalet er du med på å påverke kva parti eller liste som får størst innverknad, og dermed også dei beste høva til å få gjennomslag for politikken sin den kommande kommunestyreperioden. Dei som er valde inn i kommunestyret, og andre politiske råd og utval, representerer innbyggjarane. Dette er den mest tradisjonelle forma for medverknad og inneber at dei folkevalde, basert på programmet til partiet, tek avgjerder på vegne av innbyggjarane.

Ein viktig del av jobben til politikarane er å ha kontakt med innbyggjarane. Om du ynskjer å kome i kontakt med ein politikar, kan du til dømes sende ein e-post.

 Gå til oversikt over kommunestyrerepresentantar. 

Ved å vere medlem i eit politisk parti eller liste har du høve til å påverke politikken til partiet og kva personar som blir sett opp på listene til partiet til kommunevalet. Som medlem i eit parti/liste kan ein også stille til val til dei politiske organa til kommunen. Som folkevalt er ein med på å bestemme gjennom behandling av saker i kommunestyret eller andre råd og utval som har myndigheit til å gjere vedtak.

Det er eit grunnleggjande demokratisk prinsipp at den som blir ramma av eit offentleg vedtak, skal ha høve til å uttale seg før det blir gjort eit vedtak. Høyring er prosessen der kommunen, eller ein annan offentleg instans, ber om å få ei skriftleg uttale til ein konkret sak eller plan, før det blir gjort eit vedtak.

Ein viktig del av arbeidet med planar er å få innspel frå innbyggjarane. Du kan kome med innspel i to runder i planarbeidet:

• når planarbeidet startar (ved varsel om oppstart)
• når forslaget er utarbeidd (ved offentleg ettersyn)

Kven kan gje innspel? 

I ei lovpålagd høyring blir det opplyst om kven som er formelle høyringsinstansar og partar.

Når ei høyringa ikkje er lovpålagd er det i utgangspunktet ope for alle å gi innspel. Partar som er spesielt ramma kan bli oppmoda til å delta.

Korleis gje innspel? 

Du kan sende innspel til ei sak både på e-post og via post: 

E-post: post@lom.kommune.no

Postadresse: Sognefjellsvegen 6, 2686 Lom.

Kva skjer etter at høyringa er ferdig?

Når høyringfristen er gått ut vurderer kommunedirektøren alle innspela som er komne inn. Når saka blir lagt fram for politisk behandling vil alle innspel ligge ved saksdokumenta. 

Her kan du sjå kva saker som er på høyring akkurat nå.

Det finst ei rekkje ulike friviljuge organisasjonar innan mellom anna idrett og kultur. Organisasjonane held på med aktivitetar medlemmane er interesserte i, og kan vere ei sterk stemme når dei representerer mange medlemmar. 

Nokre organisasjonar er samla i eigne råd som ivaretek eit spesielt tema. 

Les meir om råd og utval

Sjå oversikt over foreiningar og lag

Når du får ei teneste, har du som regel rett til å vere med og forme ut korleis tenesta skal vere. Korleis tenestene jobbar med dette varierer, så be om rettleiing frå den tenesta du er i kontakt med.