Utfordringsbiletet

KOSTRA-analysen for 2024 viser tydeleg at Lom kommune driftar dyrare enn samanliknbare kommunar.

I følgje analysen er:

• Driftsutgifter per innbyggjar: 99 152 kr
• Benchmark-snitt: 81 894 kr
• Avvik: +21 %
• Årleg meirkostnad: ca. 38 mill. kr

Dette betyr at Lom kommune årleg brukar 38 millionar meir enn kommunar med liknande tenestestruktur og innbyggjartal. 

Vi treng ikkje spare heile gapet til KOSTRA (38 mill.) fordi kommunen har varige inntekter som ikkje ligg inne i KOSTRA-nivået, særleg kraftinntekter. Når desse vert tekne med, er det reelle omstillingsbehovet rundt 20,7 mill.

Når fond vert tappa for å halde drifta oppe, skjer to ting:

1. Handlingsrommet i framtida blir mindre
2. Rente- og finansinntektene blir svekka

Dette er ein av årsakene til at Lom kan tape opptil 4,3 årsverk innan fire år, og dagens underskot held fram.

Å «bruke av sparepengane» gjev altså kortvarig lindring, men forsterkar utfordringa på sikt. 

Behovet for helse- og omsorgstenester vil auke i åra framover. Den medisinske utviklinga gjer at fleire sjukdomar kan behandlast, og at fleire menneske lever lenger – ofte med behov for oppfølging.

Lom kommune har 15 % fleire eldre enn ein gjennomsnittskommune i Norge. Den aukande delen av eldre har konsekvensar for samfunnet på fleire nivå. Den demografiske utviklinga krev ofte tilpassingar i offentlege tenester, som til dømes helse- og omsorgstenester, bustadtilbod og sosiale støtteordningar. Samstundes får kommunane fleire oppgåver innan rehabilitering, psykisk helse og rus.

Dette betyr:

• Fleire brukarar av helse- og omsorgstenester
• Færre arbeidstakarar tilgjengeleg
• Høgare kostnader og kapasitetsbehov

Konsekvensen er at vi får fleire oppgåver, færre ressursar og høgare forventningar – ei utvikling som ikkje går over av seg sjølv. 

Når talet på innbyggjarar i yrkesaktiv alder går ned, kan også skatteinntektene bli lågare. Samstundes aukar behovet for kommunale tenester.

Dette kan gjere det meir krevjande for kommunen å finansiere både dagleg drift, investeringar og utvikling av tenestene i framtida.

Lom kommune opplever, som mange andre kommunar, utfordringar med å rekruttere og halde på kvalifisert arbeidskraft.

Når det er mangel på kompetent arbeidskraft, kan det bli vanskelegare å oppretthalde ynskt kvalitet i tenestene. Samstundes kan kostnadene til rekruttering og vikarbruk auke. Kommunen konkurrerer også med andre kommunar og med privat sektor om den same arbeidskrafta.

Kommunane står generelt overfor strammare økonomiske rammer i åra framover. Auka kostnader, fleire oppgåver og større krav til kvalitet i tenestene utfordrar kommuneøkonomien.

For Lom kommune betyr dette at vi må prioritere ressursane godt og vurdere korleis vi organiserer og utviklar tenestene våre. Målet er å sikre gode og berekraftige tenester til innbyggjarane – også i framtida.