Tilskot til aldersvennleg oppgradering av bustad

Du kan søkje dersom minst éin person i husstanden er 62 år eller eldre.

Bustaden må vere heilårsbustaden din og adressa du er folkeregistrert på. Både bustadeigarar og leigetakarar kan søkje. Dersom du leiger bustaden, må du ha samtykke frå utleigar.

Du kan søkje om støtte til tiltak som gjer bustaden tryggare og enklare å bruke. Det kan til dømes vere:

• trinnfri inngang til bustaden
• tilpassing av bad
• fjerning av tersklar og nivåforskjellar
• betre belysning
• støttehandtak og rekkverk
• andre tiltak som reduserer fallrisiko eller gjer bustaden meir tilgjengeleg

Tilskotet gjeld ikkje vanleg oppussing eller modernisering. Tiltaka må bidra til å gjere bustaden meir aldersvennleg.

Du kan få tilskot på inntil 25 prosent av kostnadene, og maksimalt 75 000 kroner.

Tiltaka du søkjer støtte til, må koste minst 40 000 kroner. Tilskotet blir utbetalt etter at arbeidet er ferdig og kostnadene er dokumenterte.

Du kan berre få tilskot éin gong per bustad.

Du må søkje om tilskot før arbeidet startar.

Før du sender inn søknaden, må du hente inn eit spesifisert pristilbod eller kostnadsoverslag frå ein handverkar. Arbeidet må utførast av eit lovleg etablert og registrert firma.

Dersom du skal gjennomføre eit større prosjekt, til dømes pusse opp eit heilt bad, må det gå tydeleg fram av pristilbodet kva delar av arbeidet som gjeld den aldersvennlege tilpassinga du søkjer støtte til.