Arealstrategi

Temaet er knytt til mål 6.11 i samfunnsplanen: Lom kommune skal sikre eit meir attraktivt og variert bustadtilbod gjennom aktiv tilrettelegging og tett samarbeid med andre aktørar, slik at fleire vel å bu og etablere seg i kommunen.

Dette skal skje på same tid som ein varetek andre viktige samfunnsomsyn. Særleg viktige omsyn er knytt til behovet for samlokalisering og effektiv kommunal tenesteyting, sikkerheit frå naturfarar, jord- og skogbruksinteresser, transportbehov og klimagassutslepp, biologisk mangfald og forhald knytt til folkehelse, friluftsliv og nærmiljø.

For å få til dette skal vi:

1 . Legge til rette for bustadbygging på Fossbergom og i grendene, tilpassa ulike behov. Bustadbygginga skal som hovudprinsipp skje konsentrert og i tilknyting til eksisterande infrastruktur, med opning for noko spreidd busetnad.

2 . Utarbeide kommunal retningslinje for dispensasjonshandsaming av tiltak i LNFR-område. I arbeidet med retningslinja skal ein seie noko om:

• Storleik på tomt.
• Krav knytt til moglegheiter for å etablere vatn- og avlaupsanlegg samt etablering av tilkomst frå offentleg veg.
• Totalt arealbeslag inkludert tilkomst og infrastruktur.
• Kva type areal kommunen absolutt ikkje vil omdisponere.
• Krav til sikker byggegrunn og utgreiingsansvar (naturfare)

Vidare skal ein vurdere om retningslinjene bør seie noko om kva omsyn som skal vege tungt som ikkje elles får si handsaming gjennom lov eller forskrift. Dette kan til dømes vere omsyn til:

• Landskapsbilete og naturmiljø som elles ikkje har noko vern eller på anna vis er tillagt ekstra landskapsverdi.
• Trekk, viktige korridorar og leveområde for vilt og andre artar som ikkje elles har noko vern.
• Område som er lokalt viktig for friluftsliv og folkehelse.
• Område som ligg utanfor verneområde, men som kan ha verdi som del av ein besøksstrategi.

Temaet er knytt til mål 1.6 i samfunnsplanen: Lom kommune skal praktisere eit strengt jordvern for å byggje opp under sjølvforsyning, mattryggleik og beredskap.

I tida fram mot revidering av kommuneplanens arealdel skal vi ha eit særleg medvit kring jordvern, og halde fram med ei streng dispensasjonsordning kva gjeld dyrka mark.

Omdisponering av dyrka mark skal vere siste utveg når det kjem til å løyse arealutfordringar. Omsynet til jordvern må likevel sjåast opp mot prosjekt der samfunnsnytten er særleg stor.

For å få til dette skal vi:

1 . Ved neste revidering av kommuneplanens arealdel ta ei ny vurdering på dyrka mark som i kommunale arealplanar er avsett til utbyggingsformål. Viktige moment å vurdere vil vere:

• Kva utbyggingsføremål er arealet sett av til?
• Kor stor er samfunnsnytten knytt til utbygginga?
• Er det mogleg å møte behovet utan å bygge ned dyrka mark?
• Kva konsekvensar har det å ta det ut av planen og la det ligge som dyrka mark?
• Utnyttingsgrad for dei areala som eventuelt blir liggande til utbygging
• Skal ein arbeide med å finne erstatningsareal for omdisponert dyrka mark? Eventuelt kvar bør slikt areal ligge for å gje effektiv drift og ikkje kome på kollisjonskurs med andre interesser?

2 . Vurdere forholdet til dyrka mark i utarbeidinga av ei kommunal retningslinje for dispensasjonshandsaming av tiltak i LNFR-område.

Temaet er knytt til mål 1.9 i samfunnsplanen: Lom ønskjer å bidra til auka produksjon av fornybar energi, innafor naturen si tolegrense.

Når vi vurderer utbygging av fornybar energi, skal omsynet til natur- og landskapsverdiar vege tungt. Kommunen ønskjer ikkje storskala sol- og vindkraftutbygging, men skal leggje til rette for naudsynt utvikling av distribusjonsnettet og anna kritisk infrastruktur.

For å få til det skal vi:

1 . Ved arealplanlegging:

• Vurdere moglegheitene for utbygging av fornybar energi på grå areal, eksisterande industri- og næringsområde og på næringsområde som er i ferd med å byggast.
• Gjennom føresegner stille krav om at til ein vurderer utnytting av restvarme frå industri og datalagringssenter ved eventuelle etableringar.

2 . Ved revidering av kommuneplanens arealdel:

• Vurdere om vi har eigna areal for solkraftanlegg under 10 MW.
• Gjera ei ny vurdering av om føresegnene i større grad kan opne for små vindmøller for privat energiforsyning.

Temaet er knytt til mål 4.1 i samfunnsplanen: Kommunen skal synleggjere og legge til rette for attraktive næringsareal og næringslokale, anten plassert i Lom eller i nabokommunane som er ein del av eit felles bu- og arbeidsmarknad.

Kostnadar knytt til opparbeiding og tilrettelegging av næringsareal må balanserast opp mot andre kommunale oppgåver og omsyn knytt til m.a. klima, natur og folkehelse. Kommunen må gjer jamlege vurderingar knytt til marknadsbehov og etterspurnad, arealreservere og utnyttingsgrad, og tilpasse utviklinga etter det.

For å få til dette skal vi:

1 . Ved arealplanlegging:

• Kontorplassar og varehandel bør lokaliserast i tettbygde strøk der det er mogleg, for å bidra til eit levande sentrum.
• Kraftkrevjande næring bør lokaliserast der det er naturleg ut frå Statsnett sine områdeplanar.
• Bedrifter og bransjar som skaper heilårsarbeidsplassar skal prioriterast framfor næringar som krev få eller ingen arbeidsplassar, i den grad kommunen kan påverke dette gjennom arealstrategien.
• Legge til rette for fortetting og betre utnytting av eksisterande næringsareal. Dette kan skje gjennom planføresegner eller andre tiltak som gjer det enkelt for lokalt næringsliv å utnytte eksisterande areal godt.

2 . Ved utvikling av næringsareal:

• Næringsareal der kommunen er grunneigar bør så langt som råd regulerast og bli opparbeidd fram til tomtegrensa.
• Kommunen skal aktivt søkje samarbeid med private grunneigarar og regionale og nasjonale samarbeidspartnarar der dette er hensiktsmessig.
• Kostnadar knytt til opparbeiding og tilrettelegging av næringsareal må balanserast opp mot andre kommunale oppgåver og omsyn mellom anna til klima, natur og folkehelse.