Klima og natur, Beredskap

Det er venta at snøsmelting vil kome tidlegare på året, og sjølv om det er venta auke i sommarnedbøren er det sannsynleg at ein kan få lengre periodar med låg vassføring i elvene om sommaren, og lengre periodar med låg grunnvasstand. Dersom breane blir mindre kan det gje store utfordringar for den kunstige vatninga som vi er avhengige av i området.

I Lom er naturfare eit nærast dagleg tema. Bratte dalsider og flaumutsette elver gjer oss eksponerte for naturkreftene. Dette pregar korleis forvaltninga må utøve sine oppgåver. Dei siste åra har kommunen vore råka av fleire hendingar med konsekvensar for busetting, idrettsanlegg, næringsområde og landbruksareal. 

Topografi og naturfare gjer det utfordrande å finne til dømes nye næringsareal og bustadareal.

Den viktigaste påverknadsfaktoren for naturmangfaldet på land er endringar i arealbruk. Inngrep som kvar for seg verker små kan i sum ha ein negativ påverknad på naturmiljøet. Sjølv om Lom har store verna areal så er omsynet til klima og naturmangfald viktig når vi arbeider med arealbruk.

Arbeidet med totalforsvaret understrekar behovet for å styrkje samhandlinga mellom sivile og militære aktørar, og for å auke medvit og beredskap i heile samfunnet. For kommunen inneber dette ei tydelegare rolle i totalforsvaret, med ansvar for å sikre kontinuitet i tenester, støtte opp under nasjonale beredskapsstrukturar og bidra til lokal motstandskraft. God samordning mellom interne einingar, nødetatar, nabokommunar, regionale styresmakter og relevante forsvarsaktørar er avgjerande. Frivillige organisasjonar er ein viktig ressurs, både i det førebyggjande arbeidet og ved handtering av akutte hendingar.

Som ein liten generalistkommune er Lom sårbar når det gjeld kapasitet og kompetanse innan beredskap. Samstundes er krava til beredskap omfattande. Interkommunalt samarbeid er ein sentral strategi for å styrkje kapasitet og kompetanse, mellom anna gjennom felles beredskapskoordinator med Skjåk kommune og felles regional beredskapskoordinator i Nord-Gudbrandsdal.

I åra framover vil behovet for ei meir systematisk og førebyggjande tilnærming til beredskap auke. Totalforsvarsperspektivet inneber at kommunen må vidareutvikle evna til å handtere både fredstidshendingar og kriser med større kompleksitet. Dette omfattar betre integrering av beredskap i planlegging, styrkt kunnskapsgrunnlag, auka øvingsaktivitet og tiltak som styrkjer eigenberedskap i befolkninga. Evna til å førebygge, handtere og lære av hendingar vil vere avgjerande for å sikre eit trygt og robust lokalsamfunn.