Berekraft

Klima og miljø er viktig for verda og Noreg, og derfor også for Lom. Utslepp, forsøpling og nedbygging av natur og jordbruksareal bidreg til utfordringar både globalt og lokalt. Det blir stilt krav til verksemder og forvaltning for korleis planlegging og utvikling kan skje på ein mest mogleg miljøvenleg måte som tener naturen, oss og dei som kjem etter oss.

Berekraft handlar også om å sikre økonomisk tryggleik for menneske og samfunn. Økonomisk utvikling bør skje gjennom grøn vekst, som sikrar folk sine behov, og samstundes held seg innafor naturen sine tolegrenser. Digital transformasjon vil vere eit sentralt verkemiddel i dette arbeidet. Gjennom smart bruk av teknologi og nye arbeidsmåtar kan kommunen redusere ressursbruk, effektivisere tenester og leggje til rette for betre digital samhandling mellom kommunen og innbyggjarane.

Berekraft knytes også til sosiale forhold. Alle menneske har rett på eit anstendig liv: Utdanning, anstendig arbeid, likestilling, kulturelt mangfald og godt helsetilbod. Digitale løysingar kan bidra til betre tilgjenge, auka inkludering og meir likeverdige tenester, samstundes som dei styrker evna kommunen har til å møte framtidige utfordringar.

1 Lom skal vere ei kommune der omsynet til klima og miljø ligg til grunn for forvaltnings- og utviklingsarbeid.

1.1 Frå og med 2027 skal det utarbeidast årleg klimarekneskap for den kommunale tenesteproduksjonen, for å kunne måle energiforbruk og miljøutslepp samt graden av gjenbruk.

1.2 Med utgangspunkt i klimarekneskapen skal energiforbruket og miljøutsleppet i den kommunale tenesteproduksjonen reduserast, og graden av gjenbruk aukast.

1.3 Lom skal vere ein spydspiss innan berekraftig reisemålsutvikling og i forkant av utfordringar knytt til overturisme.

1.4 Lom skal ta ein nasjonal posisjon innan berekraftig beitebruk i landbruket.

1.5 Det skal gjennomførast klima- og miljøtiltak i landbruket.

1.6 Lom kommune skal praktisere eit strengt jordvern for å bygge opp under sjølvforsyning, mattryggleik og beredskap.

1.7 Kommunen skal bidra regionalt for å redusere klimautsleppa frå transportsektoren.

1.8 Kommunen skal arbeide for ei rovviltforvaltning som, innafor dei politiske måla, tek omsyn til beitenæringa.

1.9 Lom ønskjer å bidra til auka produksjon av fornybar energi, innafor naturen si tolegrense.

2 Lom kommune skal sørge for ei berekraftig forvaltning av økonomi og ressursar for å sikre tenester til innbyggjarane.

2.1 Lom kommune skal ha eit nivå på tenesteproduksjonen i tråd med den demografiske utviklinga.

2.2 Kommunen skal ha eit nivå på investeringar som legg til rette for ein framtidsretta og effektiv tenesteproduksjon, og samstundes sørger for forsvarleg økonomisk bereevne.

2.3 Kommunen skal ha ei langsiktig forvaltning av kraftinntektene.

2.4 Kommunen skal ha ei bygningsmasse som er i samsvar med behovet i dei kommunale tenestene og skal sørge for tilstrekkeleg vedlikehald av bygga.

2.5 Kommunen skal utnytte handlingsrommet som ligg i tillitsreforma til å utvikle det kommunale sjølvstyret, og arbeide for mindre statleg detaljstyring og rapportering.

2.6 Kommunen skal bruke digitalisering som verkemiddel for å vidareutvikle og effektivisere tenester, og styrke omstillingsevna i organisasjonen.

2.7 Kommunen skal vere ein aktiv pådrivar for samarbeid med kommunar og andre aktørar der det er tenleg for å løyse oppgåva.

2.8 Systematisk jobbe for å reindyrke antal samarbeid, ordningar og fora som kommunen deltek i/på med mål om å kutte kostnadar.

3 Lom skal vere eit sosialt berekraftig lokalsamfunn.

3.1 Lomssamfunnet skal vera kjenneteikna av at innbyggjarane har god tillit til samfunnet, kvarandre og offentlege tenester.

3.2 I Lom skal det vera tilgang på arbeid, utdanning og gode nærmiljø.

3.3 Kommunen skal arbeide for styrka beredskap og auka samfunnstryggleik slik at innbyggjarane opplev at det er trygt å bu i Lom.

3.4 Kommunen skal arbeide for god forsyningstryggleik, og forvalte drikkevassressursane på ein god og trygg måte.

Sist endret 26.10.2026 12.13

Hei! Kva ser du etter?