Dagsturhytta i Lom kommune ligg i Garmo, på Sprekkberget nedanfor Høgkollen.
Lett tiljgengeleg tur for alle aldrar
Utgangspunktet er parkeringsplassen ved Garmo barnehage. Frå der går det merka råk oppover lia på vestsida av barnehagen. Turen er om lag 900 meter lang med rundt 200 høgdemeter stigning. Det er noko bratt i starten, men du får raskt belønning i form av nydeleg utsikt undervegs. Turen tek vanlegvis 20–30 minutt, avhengig av tempo, og er overkomeleg for dei fleste – også barn frå 3–4 år og oppover.
Ei hytte i fellesskapet sitt eige
Dagsturhytta vart reist hausten 2024, og er ein del av den nasjonale satsinga på dagsturhytter. Hytta er finansiert gjennom samarbeid mellom fylkeskommunen, Sparebankstiftelsen DNB, Lom kommune og lokale aktørar.
Bygginga er gjort av Brun Bygg AS, med grunnarbeid frå Gjeisar Maskin.
Garmo IL har teke på seg ansvaret for drift og vedlikehald, slik at hytta kan vere til glede for både fastbuande og tilreisande i lang tid framover.
Vellukka opning
Offisiell opning vart markert 19. oktober 2024 med stort oppmøte, kaffi, kanelsnurrar og aktivitetar for barna. Ordførar Kristian Frisvold klipte snora og ønska velkomen til ein møteplass som allereie har vorte godt motteken. Sjå bilete under.
Bruk av dagsturhytta
For at hytta skal vere ein triveleg stad å kome til – både for deg og for neste besøkande – minner vi om nokre enkle brukstips:
- Vedovn: Inne i hytta står det ein vedomn du kan fyre i. Hugs å ta med ved dersom du ønskjer å bruke den.
- Sko: Ta av skoa eller børst godt av deg før du går inn. Heimestrikka tøflar står klare til deg som vil ha det lunt og godt.
- Hyttebok: Skriv deg gjerne inn i hytteboka – små helsingar og notat gjer boka til eit fint minne for alle som kjem etter deg.
- Ta vare på hytta: Kost over golvet, ta med søppel heim og sjå til at døra er lukka når du går. Slik held vi hytta hyggeleg og rein for alle.
Velkomen innom!
Dagsturhytta i Sprekkberget er open for alle – året rundt. Her kan du varme deg, lesa ei bok frå bokhylla eller berre sitja stille og sjå utover bygda.
Enten du tek turen åleine, saman med familien eller med vener, er hytta eit lågterskeltilbod som gjer naturen endå meir tilgjengeleg.
God tur – og velkomen til dagsturhytta i Lom!