Garden Skjerpingstad ligg om lag åtte minutt frå Fossbergom, omkransa av fantastisk utsikt og bratte bakkar. Olivia er utdanna regnskapskonsulent og agronom, tok over garden i 2018 og arbeide i tillegg 80 % på regnskapskontor den gongen. Etterkvart valde ho å satse som gardbrukar på heiltid. Til garden høyrer 68 daa fulldyrka jord, 8,9 daa innmarksbeite, 118 daa produktiv skog, samt ei seter. Med god hjelp av samboer Kristian Wang har dei gjennom åra utvikla garden på fleie område.
I takt med ei lang rekkje bygge- og restaureringsprosjekt, har dei klart å auke ressursgrunnlaget med kvote og jord. I dag produserer dei 120 tonn mjølk og leverer slakt til det lokale slakteriet Dalir. Turistar frå heile verda finn vegen til Skjerpingstad for ei overnatting og for å oppleve gardsdrifta på nært hald.
Økonomibakgrunnen kjem godt med og målretta har dei utvikla steg for steg. I Skjerpingstad driv dei heilårs mjølkeproduksjon, og vi møter både hundar, katt, kalvar og mjølkekyr på innmarksbeite. Sinkyr og ungdyr går på utmarksbeite i Smådalen. Fjoset frå 1970-talet vart totalrestaurert i 2022, med generasjonsskiftetilskot frå Innovasjon Norge. Lausdrift er det derimot ikkje.
Kravet om lausdrift innan 2034 er ei utfordring for mange gardsbruk i Lom, ikkje berre i Skjerpingstad. Olivia fortel at ho støttar kravet om lausdrift av omsyn til at dyra får bevege seg laust heile året, men meiner at kravet burde vore knytt til nybygg. Det er ein fordel at gardbrukaren sjølv kan velje tidspunktet som passar best for ei så stor og avgjerande investering. Det skal trass alt passe inn med livet ellers. Olivia er også oppteken av at ungdommen skal kunne finne gleda og lære seg arbeidet på garden, og lærer opp lokal ungdom til å bli avløysarar.
Vi takker så mykje for at vi fekk ta turen, og ynskjer denne fine familien masse lykke til med vidare matproduksjon og utvikling av garden!