Det vart etablert natteravngruppe i samarbeid med politikontakt, friviljugsentralen i Lom, FAU og ungdomskonsulent. Ungdommar i Lom fekk reetablert tilbodet om ein møteplass for ungdom i andre etasje på Drengjestugu. På klubben kan ungdommane delta på etterskule-tilbod og klubbkveld ein gong i veka. Klubben har fått innvilga frifondsmidlar til aktivitetsutstyr og datakultur-prosjekt i 2023. I samarbeid med Lom folkebiblioteket har det frå hausten vore arrangert ungdomskafé kvar onsdag etter skuletid.

2022 skulle vera året der vi skulle attende til "normalen" etter restriksjonar under pandemien. Det skulle syne seg at det var no vi vart mest ramma av dette, med sjukdom både på barn og vaksne, der vi ei periode hadde meir barnepass enn pedagogisk tilbod på barnehagane. Dette var nok ei krevjande periode både for heim og barnehage.

Men arbeidet med å sikre eit trygt og godt psykososialt barnehagemiljø fortsette gjennom året. Mellom anna hadde vi eit felles personal- og foreldremøte på våren, der tema var kva lovendringa inneber, foreldresamarbeid og deira rolle i dette arbeidet.

Fokusområdet vårt var den vaksne si rolle i uteleiken, der vi utviklar praksisen vår på eigen barnehage. I tillegg har vi også hatt eit samarbeid med Høgskulen rundt språk hausten 2022.

Elles skal barnehagen vera prega av barna sine initiativ! Det daglege livet skal vera gjennomsyra av leik, omsorg og læring gjennom leik. Våren ga oss også høve til å førebu skulestartarane betre på overgangen til skulen, samarbeid på tvers var endeleg mogleg att!

Appen "Min barnehage" er framleis under utvikling og vi prøvar oss litt fram her, i (u-) takt med denne. Vi testa ut kalenderfunksjon på hausten, men fann ut at denne dekte ikkje alle våre behov enno, og gjekk attende til meir tradisjonell månadsplan inntil vidare. Generelle attendemeldingar frå foreldre er at dei er tilfreds med appen som kommunikasjonskanal.

2022 starta med koronarestriksjonar og mykje sjukdom i båder personalet og blant borna, men etter kvart vart det meir normale tilstandar og vi kunne byrje ha aktivitetar att. I Garmo barnehage har det i 2022 mellom anna vore desse aktivitetane

Det vart arrangert vinter-OL i Beijing og Garmo samstundes. Det var eit stort arrangement som krevde mykje førebuing. Vi lærde om nasjonane som skulle delta og laga flagga deira. Start -mål og ulike informasjonsskilt vart produsert , og sjølvsagt fine medaljer. Det var opningsseremoni med fakkel , mange ulike grener og premieutdeling. Stor stas og kjempeinnats av alle deltakarar med sjølvsagt medaljedryss.

Gallafest vart endeleg arrangert på nytt. Dette har vorte ein tradisjon i barnehagen i Garmo og arrangementet i 2022 vart ein stor suksess. Festen inneheld mykje glam og glitter slik som; diamanter, smykker, gele i håret, oppsett hår, slips, sløyfe, glittersko, fine antrekk, raud løpar, "champagne", middag, dessert, dans og fotografering. Både dei vaksne og borna kosa seg.

På Loar skule starta skuleåret ganske hektisk. Med eit større smitteutbrot blant både personale og elevar vart det gjort ein iherdig innsats blant tilsette, elevar og heim for å finne gode løysingar på skulekvardagen. Etter kvart opna ein opp skulen, og det var godt å kunne arrangere solfest og vere saman igjen. Dette merka ein og når klassene i stadig større grad kunne finne på opplegg på tvers av klassestega.

Ei gladsak hausten 2022 var at skulane i Lom gjorde det godt på elevundersøkinga, og fekk godkjendstempel grønt frå Statsforvaltaren i innlandet sin rapport for kommunane.

Samarbeid med ulike aktørar i nærmiljøet er viktig for Loar skule. Fjellsenteret og Gudbrandsdalsmusea har vore brukt til ulike opplegg, i tillegg til andre som stiller opp. Det er godt å ha Presthaugen som eit utvida skuleområde, og det er i flittig bruk blant klassene på skulen. I tillegg er biblioteket svært viktig for skulen, og ein har eit godt samarbeid for besøk.

Skulen har faste dagar for besøk av skulehelseteneste, og PPT har fast besøksdag annankvar veke.

Eit høgdepunkt på skulen hausten 2022 var solidaritetsaksjonen. Her bidrog klassene med ulike aktivitetar for å samle inn pengar til innsamlingsaksjonen. Mange folk var innom denne dagen, og ein såg på dette som ein veldig positiv dag for å vise fram skulen.

Loar skule er svært heldig som har engasjerte foreldre som tek del i borna sin skulekvardag. Når borna er på skulen gjer dei seg nytte av alle dei apparata som FAU har vore med på å ordne i stand, og dei kan boltre seg både på den nye skøytebana og i andre apparat. I tillegg er gapahuken eit svært godt brukt turmål. På slutten av skuleåret vart det ikkje gjennomført juletrefest. FAU har etterlyst dialog rundt dette og andre arrangement, noko skulen vil følgje opp i 2023.

Trass i tidvis heftig testing av både elevar og tilsette for korona, og at eksamen vart avlyst på tredje året, byrja Lom ungdomsskule og vende attende til kvardagen.  Dette vart feira med to skuleball i 2022, påskeball og juleball. Elevane fekk også reist på skuleturar att. 10. klasse drog på tur til Eidsvoldbygningen og Stortinget. 9. klasse overnatta i lavvo på Liafjellet, og 8. var på leirskule på Bjørnsund. Bondebryllaup vart også arrangert igjen.

I juni fekk skulane i Lom synt fram for heile kommunestyret, korleis elevane no arbeider og dokumenterer si kompetanse på andre og nye måtar ved hjelp av læringsbrett med filmar, mulitmodale tekstar, digitale bøker og tankekart. Hensikta er ikkje meir tid framfor skjerm, men meir variasjon med aktive og utforskande elevar. Trur nok mange vart overraska over kor flinke elevane er.

Onsdag 7. september gjekk det eit stort ras like ovanfor Røisheim og vegen vart stengd. Skulane førebudde seg på å starte ei eiga avdeling av skulen på Galdesand, men heldigvis opna vegen raskt igjen.

Arbeidslivsfaget skal gje elevane erfaring med praktiske og yrkesretta arbeidsoppdrag. Dei har bidrege mykje i Grov med maling, beising, montering av hyller og luking. I tillegg har dei laga julelunsj og anna mat for sal i kantina. Elevane fekk verkeleg prøvd seg då dei skulle demontere store delar av skulekjøkenet, før det skulle pussast opp.

Elevane frå Lom vann ei reiselivskonkurranse om beste reklamefilm for heimkommunen i 6K. Alle trinna på ungdomsskulen var med på "Hold Innlandet rent", kor vassdraga blir rydda for søppel. Elevane driv elevbedrift, og dei deltar i "Vi bygger Norge". Det er også mange bedriftsbesøk gjennom heile ungdomsskulen som  til dømes Eidefoss, Ysteriet, Mølla og Interfil. Alle har besøkt Fjellsenteret og 10. får reise til Klimaparken. Skulen har orienteringsdag, innebandyturnering og skidag.

Hausten 2022 fekk ungdomsskulen "skule-hund". Det er mange aktivitetar og øvingar ein kan gjera med hund som aukar motivasjon og lærelyst. Hundar kan brukast på mange forskjellige måtar, ikkje berre til å lære, men gje positive pausar, auka sjølvtillit, nærleik, støtte og følelse av meistring. Ved å gjere aktivitetar med hund kan elevane øve på samarbeid, kommunikasjon og sjølvregulering.

Skulen har også skapt nye tradisjonar dei siste åra. På morgonen i desember er det fyr i bålpanne og servering av peparkaker. Det er også starta opp med julelunsj for alle elevar og tilsette, som elevane i arbeidslivsfag sørger for, i tillegg til påskelunsj og julegraut som har vore tradisjon i mange år.