Har du besøkt Dagsturhytta? 

Dagsturhytta i Lom ligg i Garmo, og vart satt opp hausten 2024. Det er eit flott turmål som passar dei aller fleste. Barn frå rundt 3-4 år og oppover vil klare å gå denne turen om dei har vore litt på tur tidlegare. Frå Dagsturhytta kan du gå vidare opp på Høgkollen viss du ynskjer det. Sjå bilder frå hytta lenger ned!

Vegbeskriving

Beskriving parkering og sti til Dagsturhytta

Ein kan nå Dagsturhytta frå fleire stader, men vi anbefaler å parkere ved Garmo barnehage og starte turen frå her. Frå rv15 er det skilta avkjøring mot Garmo barnehage. Følg deretter Knut Hamsuns veg til du kjem opp til parkeringsplassen til Garmo barnehage (tidlegare Garmo skule).  Frå her er det førebels ikkje skilta, men dette kjem. Fylg sti/traktorveg sørvest for Garmo barnehage, forbi eit bustadhus og eit lite skur (rød stipla line i kartutsnittet). Stien opp mot Dagsturhytta og Høgkollen startar gjennom ein grind rett bak barnehagen. 

Frå her er det om lag 900 meter og 200 høgdemeter opp til Dagsturhytta.  Det er noko bratt i starten, men med ei belønning i form av nydeleg utsikt undervegs. Turen opp tek om lag 20-30 minutter, avhenging av tempo.

Bruk av Dagsturhytta

• Vedovn: Inne i Dagsturhytta finst det ein vedovn som ein kan nytte viss ein vil. Hugs å ta med ved om du vil fyre! 
• Sko: Ta enten av skoa eller børst godt av deg på beina før du går inn. Det er heimestrikka tøflar du kan nytte medan du er på “dagsturhyttetur”.
• Hyttebok: Skriv deg gjerne inn i hytteboka!
• Ta vare på hytta vår: Sjå til at det ser fint ut i hytta før du forlet den. Kost over golv, ta med deg søppel heim, sjå til at døra er lukka. Då blir det ein triveleg plass å komma til for neste besøkande. 

Det er Garmo IL som har vedlikehaldsansvaret for Dagsturhytta i Lom. 

Har du spørsmål eller vil melde frå om noko angåande Dagsturhytta kan du ta kontakt med Garmo IL på post@garmo-il.no eller prosjektleiar for Dagsturhytta i Lom kommune på hege.olimb.myhre@lom.kommune.no