Folk som bur langs trafikkerte vegar må klyppe hekkar og buskar på eigedomane sine - av omsyn til eigen og andre sin tryggleik. Om ei veke startar ungane på skulen att og vi ynskjer at flest mogleg skal gå og sykle, seier Marianne Mittet Solbraa, regionleiar i Trygg trafikk Innlandet. 

Høge, tette hekkar ved avkøyringar eller store greiner som heng ut i vegkryss gjer det særs uoversikteleg for både bilistar, syklistar og gåande. Dette er ei aukande utfordring nå i sommarmånadane. 

Klypp hekken

- Å sørge for fri sikt langs vegane er så viktig at ansvarsforholda er nedfelt i veglova. Det er du som bur langs vegen som er ansvarleg for å klyppe hekk og buskar på eigedomen din slik at det er god sikt ved vegkryss og avkøyringar. Mange må og krysse gang- og sykkelveg for å køyre ut på bilvegen. Da er det særskilt viktig at hekkar, tre eller gjerde ikkje hindrar sikta, slik at du oppdagar andre trafikantar i tide til å stoppe, seier Solbraa.