Fredag 21. februar 11.30 inviterer vi til litterær lunsj med høgtlesing og fastelavnsbollar. Bibliotekarane har leitt fram lugume tekster vi vil dele med dykk og bollar er i bestilling. Legg dugurden til biblioteket denne dagen! Ein blir aldri for gammal for fastelavnsbollar eller for høgtlesing. Velkomne skal de vera! 

Gratis inngang. Mat og kaffi 50 kr. 

 Bookbites, den nye app-en for utlån av e-bøker og e-lydbøker, er nå klar til å brukast. Mellom  11 000 og 12 000 bøker og nær 400 lydbøker er tilgjengelege for utlån og reserveringar. På startsida vår ligg lister med tilrådingar. Freistar det til dømes å lesa ein biografi som kom ut i 2019? Eller ein av favorittane til bibliotekarane?  Du kan søkje på tittel, forfattar og få oversyn over nye tilgjengelege bøker.

Gjer som Anders i filmsnutten under! Last ned appen og registrer deg med lånenummer og pinkode, og ta en kikk! Treng du hjelp med pålogging, kontakt biblioteket! Lykke til!

https://www.youtube.com/watch?v=OIZr3ojTrJY

(Bookbites-appen finn du i google play / app store)

Årets fyrste arrangement blir Litterær lunsj med Barbro Storlien. Fredag 24. jan. 11.30 kjem ho til biblioteket for å prate om boka si "Barbro broderer. Tanker, tips og teknikker", som kom ut i fjor. Barbro er opprinneleg vågåjente. Ho er kjend som @frustorlien i sosiale medium, frå bloggen Fru Storlien, og er ikkje berre bunadtilverkar, buntmakar og leiar av Norges Husflidslag. Ho er også ein svært populær kurshaldar, og ei av dei siste i Noreg som broderer profesjonelt.

Vi kjem til å fortsette med Litterær lunsj om lag ein gong i månaden utover året. Når vi ikkje har inviterte gjestar, blir det høgtlesing med bibliotekarane. Vi bestiller god mat frå kjøkkenet på Lom helseheim. Ta matpausa di på biblioteket desse fredagane du òg!

 Nå er Meg & Mitt i orden, og lånarane kan gå inn og forlenge lånetid og få oversikt over låna sine att. Vi orsakar at funksjonen har vore ute av drift. 

Vår nye kolleksjon av BIBLIOTEKBOKSAREN er ute! Bibliotekboksaren vart laga i kjølvatnet av Lom folkebibliotek vart kåra til Årets bibliotek i 2012. Den nye utgåva har rett og slett fått namnet BIBLIOTEKBOKSAREN, sidan det oss kjent er verdas einaste bibliotektruse. Den nye boksaren er meir nøytral. Teksten på strikken er nå BIBLIOTEKBOKSAREN, og biletet av Tre vise kvinner er bytt ut med ein nøytral logo med Lom folkebibliotek. Ein ypparleg idé til julegåver og ikkje minst til kalendergåver, adventslilla og flott som han er! Løp og kjøp på biblioteket til 140 kr eller i nettbutikken til 200 inkl. porto

Fredag 8. november 11.30 gjestar Laila Brenden biblioteket. Laila har anar frå Lom og er mest kjend for Fjellroser-serien der handlinga er lagt til Bøverdalen. Ho er ute med ny bok, denne gongen ein historisk roman, Toner fra en stille skog. På Litterær lunsj den 8. november  samtalar ho med redaktør Karen Forberg om den nye boka.  

 

Tysdag 26. november 19.00 kjem Ingar Sletten Kolloen til Lom. Ingar vil presenter den nye boka si om andre verdskrig. Dette er fyrste bind av fembindsverket Under krigen. Når han gjestar oss vil, han legge mest vekt på historiene frå Gudbrandsdalen. Ingar er ein framifrå forteljar og vi gler oss til han kjem til Lom med den nye boka. Det blir høve til spørsmål frå salen, kaffi, biteti og boksal. Arrangementet er lagt til Utgard fleirbrukshus. Utgard er også medarrangør. 

 

Tysdag 3. desember 19.00 kjem sjølvaste Edvard Hoem til bygda! Vi har vore så heldige å få med oss ein av landets mest populære forfattarar på avslutninga av klassikar-prosjektet som vi har køyrt i Bokåret 2019. Edvard Hoem er representert i prosjektet med boka Slåttekar i himmelen, den fyrste boka i utvandrar-serien. På BrimiBue vil han prate om bøkene og arbeidet med utvandrarserien. Ein heldig deltakar i klassikar-prosjektet vinn eit signert eksemplar av Slåttekar i himmelen. Dei ivrigaste lesarane av dei nye klassikarane, er også med i trekkinga av Skråpå tå for to på Brimi sæter som vi trekkjer denne kvelden.

 

Fredag 13. desember 11.30, på sjølvaste Luciadagen, gjestar Mette Vårdal oss med den nye boka si om jul og juletradisjonar. Ho pratar om arbeidet med boka, samtalar med publikum om juletradisjonar og juleminne og kanskje, kanskje blir det smaksprøver på julebakst med oppskrifter frå boka. 

 

Vi håpar å sjå mange av dykk på arrangementa våre utover hausten. Vel møtt!  

 

 Edvard Hoem gjestar oss tysdag 3. desember kl. 19.00! Dette er avslutninga på klassikar-prosjektet som bibliotek har køyrt i Bokåret 2019. Edvard Hoem les og fortel frå "Slåttekar i himmelen" og dei andre bøkene i utvandrarserien. Bibliotekarane i Lom gjev små smaksprøver på fleire av bøkene som er med i klassikar-prosjektet. Arrangementet er lagt til BrimiBue, og det blir høve til å kjøpe mat og drikke under tilstellinga. Velkomne til ein forfattarkveld av dei sjeldne!
Inngang: 150 kr
Arrangørar: Lom folkebibliotek og BrimiBue

Tysdag 10. september kl. 18.00 kjem lomveren Syver Olstad og kompanjong Stein Elvestad til biblioteket med ei førestilling for ungar frå tre år og oppover. Syver seier at det er ei skrømteforteljing og eit eventyr om ein svolten katt. Gratis inngang. Vel møtt!

Tysdag 17. september kl. 15.00 i Steinfjoset blir det avslutning for Sommarles 2019 med Plutselig Sirkus og utdeling av premiar! I Lom har 57 unge Sommarles-lesarar lese 1 246 bøker. Det er 20,4 bøker per deltakar, totalt 121 016 sider! Hurra for Sommarles! 
Hovudpremiane er sponsa av Sparebank1 Lom og Skjåk, Skjåk energi og Eidsiva energi. 

I kveld, 2. september kl. 19.00, blir det valdebatt på biblioteket. Listetoppane på Lomslista, Bygdalista, Lom Arbeiderparti og Senterpartiet treffest til debatt og presentasjon av partiprogram. Grete Sjurgard er debattleiar. Vel møtt! 

Kontakt

Lom folkebibliotek
Mobil 477 11 809

Bloggen vår: Tre vise kvinner

Rita Mundal
Leiar Lom og Skjåk folkebibliotek

Opningstider

Opningstider Lom folkebibliotek
Dag Tid
Måndag 12.00 - 19.00
Onsdag 12.00 - 19.00
Torsdag 10.00 - 15.00
Fredag 10.00 - 15.00
Laurdag 10.00 - 14.00